Nagapangatubang sa karun sang sampaw-sampaw nga kaso ang duha ka gin-aresto nga mga persona matapos magpakilala nga katapo sang Crime Investigation and Detection Group (CIDG) sa isa ka ilimnan nga nahamtang sa Golden Field Commercial Complex, Barangay Singcang-airport sa ciudad sang Bacolod.
Ginkilala ang mga nagkaladakpan nga sanday alyas ‘Lemuel’, 32-anyos, residente sang Barangay Bagtic Silay City, kag alias ‘Dekralphs’, 34-anyos, nga residente sang Barangay Mansilingan, ciudad sang Bacolod.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, kahapon, mga pasado alas 3:00 ang takna sang kaagahon ang isa ka manager sang ilimnan sa Golden Field ang nagpanawag sa ila estasyon agud nga magpahibalo sa ila nga may isa ka tawo nga may armas nga nanaya sang waiter sang ilimnan kag sa babayi nga gintable sang mga ini.
Suno kay Cayao, ginrespondehan ini sang mga kapulisan sang Police Station 8 kun sa diin nakuha sa isa mga nadakpan ang replica sang caliber .45 pistol nga halampangan ukon pellet guns.
Suno sa station commander, ang duha ang indi magbayad sa ila balayran nga masobra sa P3,000 bangud ang mga ini ang katapo sang CIDG.
Ginpasukot sa waiter ang duha bangud nga nagaduda na ang management sang ilimnan apang ginkuha sang isa ang gun replica kag gintaya sa waiter kasubong man sa gintable nga babayi kag nagpakilala nga katapo sila sang CIDG gani indi sila magbayad.
Ginpulihan man kastigo sang iban nga customer sang ilimnan ang duha bangud nairitar na sa mga ini kag sang nag-abot ang mga kapulisan gin-aresto nalang.
Nakahunong na sa Bacolod Police Station 8 ang duha kag nagapangatubang sang kaso nga grave threat, usurpation of authority, kag paglapas sa Republic Act 10591 in relation to COMELEC gun ban.
