Patay ang duha ka panday nga nagaangkasanay sa motorsiklo sang malasakan sang dumptruck sa Hacienda Amora Vieta, Brgy. Antipolo, Pontevedra, Negros Occidental kaina sang aga.
Ginkilala ang duha ka mga biktima kanday Rene Montaño, 43 anyos kag Omar Domingo 35 anyos, lunsay residente sang Barangay Buenavista Rizal, Pontevedra.
Sa interview sang Bombo Radyo kay Police Corporal Genesis Beñas, traffic investigator sang Pontevedra Municipal Police Station, padulong sa trabaho sa central sa syudad sang La Carlota ang duha ka mga biktima sakay sa motorsiklo.
Wala naglaom ang duha nga may yara sang nagapondo nga wing van sa unhan sang dalan kag nagkalaula ang dala nga grocery goods nga padulong kuntani sa banwa sang La Castellana.
Suno kay Beñas, mahimo nga ginlikawan sang duha ang mga naula nga grocery goods gani sa pihak nga lane ini nag-agi kag may nagasunod diri nga dumptruck.
Bangud sa paglikaw kag madanlog ang dalan tuga sang pag-ulan, nakadanlog ang motorsiklo nga ginasakyan nanday Montaño kag Domingo kag naglapaw sa natuo nga bahin sang dalan kag nalasakan sila sang nagasunod nga dumptruck.
Ginhold naman sang mga kapulisan ang driver sang dumptruck nga si Leomar Alvares, 29 anyos kag residente sang Purok Narra, Barangay Malingin, Bago City Negros Occidental samtang ang truck ang ginparescue man sang tag-iya apang ihold man ini sang Pontevedra Municipal Police Station.
