Tatlo ang gindagdagan sang warrant of arrest sa kaso nga estafa angot sa natabo nga PNP recruitment scam sa banwa sang La Castellana kag nalakip diri ang duha ka pulis nga na-assign sa Bacolod City Police Office.
Ang kaso ang natabo sang Setyembre tinalikdan nga tuig kun sa diin nagdangat sa 45 ang mga nabiktima sa banwa sang La Castellana nga nakuhaan sang P250,000 tubtob P300,000 kada isa, kabaylo sa pasalig nga sila ang segurado nga makasulod sa hanay sang Philippine National Police.
Pila sa mga biktima ang nagpangutang pa sang dako kag nagbaligya sang mga propedad agud lamang makabayad.
Ang recruiter ang ginkilala nga si Mary Jun De Los Santos, samtang naangot man diri si Sangguniang Bayan member Donato ‘Natnat’ Dumaguit.
Si Dumaguit ang ginpalos na sa Sangguniang Bayan matapos nga wala na magpakita kasunod sang issue, samtang si Delos Santos ang subong man nga indi na makit-an.
Sa interview sang Bombo Radyo kay Police Capt Francis Depasucat, station commander sang Bacolod Police Station 4, sang Hunyo 19 boluntaryo nga nagsungka ang mga police personnel.
Sa impormasyon nga nakuha sang Bombo Radyo santo man sa ginpatigayon nga pagpangusisa, kag indi nagikan kay Captain Depasucat, ang mga ini ang ginkilala kanday Police Senior Master Sergeant (PSMS) Kim Sagloria, 42 anyos, kag sunod nga adlaw, Hunyo 20, nagsungka man sa estasyon sang Bacolod Police Station 4 si Police Chief Master Sergeant (PCMS) Raymond Bandojo, 51 anyos, kag lunsay mga residente sang Brgy Estefania kag sila nga duha ang na-assign sa BCPO headquarters bilang personnel sang General Service Office (GSO).
Ang duha ka pulis ang nakabayad sang pyansa nga P18,000 kada isa para sa temporaryo nga kahilwayan.
Samtang, si Mary Jun De Los Santos naman ang sa karon naka-detain sa banwa sang La Castellana.
