Ginsentensyahan sang Bacolod Regional Trial Court nga guilty ang duha ka mga suldado sang Philippine Army may kaangtanan sa pagpatay sa aktibista nga si Benjamin Bayles sang 2010.
Sa isa ka 33-page nga desisyon, ginsentensyahan ni Judge Ana Celeste Bernad, sanday Rafael Cordova alias Rogen Bajon kag Reygine Laus alias Ronnie Caurino nga guilty sa kaso nga murder.
Lunsay ang mga ini nga ginsentinsyahan sang reclusion perpetua ukon pagkapriso sa sulod sang 20 tubtob 40 ka tuig.
Suno sa korte, santo sa testimonial kag documentary evidence, na-establish sang prosecution nga guilty ang mga akusado paagi sa supisyente nga mga ebidensya.
Gindugang man sini nga ang akusado ang naggamit sang indi lisensyado nga armas luthang agud patyon si Bayles.
Si Bayles ang ginluthang kag ginpatay sang Hunyo 14, 2010 sa Barangay Su-ay, Himamaylan City.
Samtang, suno naman kay National Union of People’s Lawyers president Edre Olalia, ang conviction sang duha ka mga military personnel ang isa ka maathag nga mensahe kag pagpaandam sa mga nagapati sa “immunity for impunity.”
Suno kay Olalia, masobra isa ka dekada ang ila ginhulat antes maconvict sang korte sa Negros ang duha ka mga army personnel nga nagpatay kay Benjamin Bayles, Bayan Muna coordinator kag miyembro sang Iglesia Filipina Independiente.
