Duha ang patay kag isa ang pilason sa nagluntad nga pagpanglabo kag pagpamuno sa Sitio Buyog, Barangay Nabulao, Sipalay City, Negros Occidental.
Ang suspetsado ang ginkilala kay Douglas Gabuya, 55 anyos kag residente sa lugar.
Ang mga nadulaan sang kabuhi ang ginkilala kanday Percy Lugay, 36 anyos kag Robert Gabunada, 34 anyos samtang ang pilason amo si Rudy Gabunada, 64 anyos kag amay ni Robert Gabunada.
Suno kay P/Maj. James Latayon, hepe sa Sipalay City Police Station, nagalantaw si Lugay sang TV sa balay sang paryente sini nga si Mary Navales sang hinali nalang nga nagsulong si Gabuya kag ginlabo ang biktima.
Nahibaluan nga pangayaw lang sa lugar si Lugay nga nag-angkon sang samad tuga sa pagpanglabo sa leog kag abaga.
Samtang sunod naman nga nagpadulong ang suspetsado sa balay sang mag-amay nga Gabunada.
Si Robert Gabunada naman ang una sini nga nakita sang makasulod sa balay nga gilayon man sini nga ginbuno, samtang ginlabo man sini ang amay nga si Rudy Gabunada nga naigo sa nawala nga bahin sang lawas, nawala nga guya kag sa likod.
Gilayon naman nga nagpalagyo ang suspetsado matapos sang ginhemo nga krimen, apang madinalag-on man ini nga nadakop sang mga katapo sang Sipalay City Police Station.
Santo sa imbestigasyon, nahibaluan nga naghambal ang suspetsado nga si Gabuya nga gin-unahan lang sini luthang ang mga biktima.
Suno kay Latayon, ginpakigbahin man ni Gabuya nga nagpahayag sa iya si Rudy Gabunada nga ini man ang nagpatay sa himata man nila sadto.
Nahibaluan nga magparente lang man sanday Gabuya kag ang mag-amay nga Gabunada, kag ginahibalo naman sang mga kapulisan kun himata man nila si Lugay.
Suno kay Latayon, apisar sa pahayag sang suspetsado sa anay krimen ni Rudy Gabunada, wala naman sila sang record sa nasasumbit nga insidente sa Sipalay City Police Station.
