Duha patay kag duha ang pilason matapos nagdangat sa pagpamuno ang pagsaway sa magahod nga pagpatukar sang music sang kaingod sa Purok Florence Ville, Barangay Pahanocoy, Bacolod City.
Ang napatay ang ginkilala nga si Richard Orita, 49 anyos kag si Rolando Pigollo; samtang pilason naman sanday Richelle Orita, 29 anyos kag Richie Orita, 27 anyos.
Ang suspect nga kasubong man nga nasamaran ang ginkilala nga si Marcelo Rojo, 67 anyos, kasado kag isa ka construction worker.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, nagaselebrar sang birthday party ang pamilya Orita para sa bata ni Richard nga napatay sang duha ka tuig pa lamang ang edad.
Pasado alas-10:00 sang gab-i, samtang naga-inom sang makahulubog nga ilimnon ang pamilya, hinali nagsulod si Rojo kag sila ang ginsaway kag ginsinggitan nga pahinayon ang music.
Apang sa baylo, ini ang ginkadtuan sang mga biktima sa iya balay kag ginkastigo, tubtob sa ini ang makakuha sang binangon kag gin-umpisahan ang pagpamuno.
Si Richard ang duha ka beses nga nabun-an sa dughan nga gintunaan sang iya kamatayon.
Si Pigallo ang napatay man matapos mabun-an sa tiyan.
Samtang padayun pa nga ginabulong si Richelle Orita nga may tatlo ka buno sa tiyan kag Richie Orita nga nabun-an sa nawala nga hita.
Sa pihak nga bahin, naka-admit man sa karun sa ospital si Rojo matapos ini ang nakaagom sang madalom nga pilas matapos ginlampusan sa ulo sang bato sang isa sa mga biktima.
Suno kay Cayao, sa tion nga makagwa na sa ospital ini ang mahunong sa kostudiya sang Bacolod Police Station 8.
unyo.
