Patay ang duha ka persona, samtang pilason naman ang duha ka iban pa matapos ginluthang sang apat ka kabahin sang isa ka pamilya sa Hacienda Nuning, Brgy Maytubig, Isabela, Negros Occidental alas-10:15 kagab-i.
Ang mga napatay ang ginkilala nga sanday Roger Guansing, 58 anyos, kasado, laborer; kag Landry Patricio, 34 anyos, single, driver.
Samtang pilason naman sanday Harlem Tando, 57 anyos, kasado, driver; kag Diolito Patricio, 74 anyos, balo, driver, nga lunsay luwas na sa katalagman.
Natumod naman ang apat ka suspect nga sanday Alyas Jorie, bata sini nga sanday Jomarie kag JA, kag manak nga si Adonis.
Sa interview sang Bombo Radyo Bacolod kay Police Major Joseph Partidas, hepe sang Isabela Municipal Police Station, ang mga biktima kag suspetsado ang palarehas nga nagatrabaho sa isa lamang ka hacienda.
Gani sinuyaay sa trabaho ang isa sa ginalantaw rasun sa kinagamo.
Sa imbestigasyon, ginpahayag ni Partidas nga samtang naga-inom ang apat ka biktima sa balay ni Harlem, nag-abot sa lugar si Jorie para magbakal kuntani sang beer.
Nag-argumento sila ni Landry, apang nag-abot naman si Adones nga manak ni Jorie kag hinali nga gintapungol si Landry.
Samtang nagapukutay, nag-abot si Roger para magbakal man kuntani sa tyangge, kag ini ang gilayon nga nagtambag sa away.
Tubtob nga gintiro ni Jorie si Roger kag Harlem, samtang nag-abot man si JA nga bata ni Jorie kag nagpalupok, kun sa diin naigo naman si Landry.
Magabulig naman kuntani si Diolito sa iya bata nga si Landry nga natiruhan, apang siya ang gintiro man ni Adones.
Si Joemarie, nga bata man ni Jorie ang yara lamang sa gwa sang area, apang nagabitbit man sang armas-luthang.
Si Roger ang naigo sang bala sa natuo nga mata, samtang si Landry ang may igo sa natuo nga bahin sang iya nga guya kag butkon, nga nagresulta sa ila nga kamatayon.
Si Harlim ang naigo naman sa nawala nga tiyan, samtang si Diolito ang naigo naman sa natuo nga tiyan.
Ang mga biktima ang gindala naman sa Ignacio I. Arroyo Memorial District Hospital, samtang nagpatigayon man sang hot pursuit operation ang kapulisan sa mga suspect.
Narecover sa crime scene ang mga basiyo sang bala sang cal 45 kag 9mm.
