Duha ang patay samtang nakaluwas ang duha ka tuig nga bata nga babayi sa nagluntad nga shooting incident sa Purok Lampirong, Barangay, Bacolod City.
Sakay sa Mitsubishi Mirage nga may plaka nga RNN562 ang mga biktima sang sila ang ginluthang takna alas-7:00 sang gab-i samtang nagausoy sa dalan sa Barangay 2, Bacolod City.
Suno kay Daniel Lapus, roving guard sang BREDCO Port nga nagresponder matapos mabatian ang lupok sang armas, patay na ang mga biktima sang sila ang makaabot sa lugar.
Ginalantaw nga ang driver amo ang amay sang duha ka tuig nga bata nga babayi nga nakasakay sa likod nga bahin sang salakyan, samtang yara naman sa passenger seat ang tiyo sang bata nga isa man ka menor de edad.
Sa pinakaulihi nga report sang Bacolod Police Station 2, ginkilala ang driver nga si Dexter Bryan Ursos samtang wala pa sang identity ang kaupod sini.
Ang bata ang gilayon naman nga ginkuha gikan sa likod nga bahin sang salakyan kag gindala na sa Bacolod Police Station 2.
Yara na ini subong sa kustodiya sang Department of Social Welfare and Development (DSWD).
Sa karun, padayun pa ang imbestigasyon sang SOCO sa nasambit nga insidente, kag ginahulat man nga may pamilya nga makig-angot sa mga otoridad.
