Patay ang duha ka lalaki matapos makabunggo sa poste ang motorsiklo nga ila ginasakyan sa Barangay Tabao, Valladolid, Negros Occidental.
Ang mga biktima ang ginkilala kanday Edcell Hilario, 30 anyos kag Adrian Salis, 23 anyos.
Suno kay P/Maj Wilfredo Benoman Jr, hepe sa Valladolid Municipal Police Station, ang nagamaneho sang motorsiklo amo si Salis samtang angkas naman sini si Hilario kag ang mga ini ang nagabyahe humalin sa norte padulong sa sur nga dereksyon.
Apang pagdangat sa kurbadahan nga dalan sa Barangat Tabao, naglapaw ang mga ini sa dalan kag nagbunggo sa poste.
Nagapati si Benoman nga madasig ang pagpadalagan sang mga biktima gani tuman ka baskog ang nangin impact sang insidente.
Ang duha ka biktima ang gindala pa sa Valladolid District Hospital apang gindeklarar nga dead on arrival.
Suno sa hepe, nakaangkon sang body kag head injuries ang mga biktima nga gintunaan sang ila nga kamatayon.
Nahibaluan nga madamo naman sang naaksidente sa nasambit nga lugar.
