Nagpalapit sa estasyon sang Bombo Radyo Bacolod ang duha ka anay security guard sa idalum sang Stelsen Security Agency angot sa wala nagasulod nga remittance sa ila SSS apisar nga may nabuhin na sa ila.
Sa interview sang Bombo Radyo kay Adrian Flores, 34 anyos, residente sang Bago City, nagatrabaho ini sadto bilang security guard sa idalum sang ahensya apang nalakip ini sa mga ginpahalin sa trabaho sang nagbuhin sang tawo ang Negros Electric and Power Corporation (NEPC).
Suno diri, naaksidente ini sang Abril kag nagpahuway apang sang magabalik na ini sa trabaho siya ang ginhambalan nga nalakip ini sa pahalinon.
Iya ginareklamo nga na-aprubahan sang SSS ang iya Sickness Benefits apang wala siya sang may nabaton halin sa ahensya.
Samtang nagreklamo man ang anay security guard nga si Rodel Gancia, 41 anyos, residente sang Victorias City nga may yara ini sang deduction sa iya sweldo apang wala man may nagasulod sa iya SSS contribution.
Suno diri, tatlo ka bulan nga wala sang may naremit sa iya SSS.
Pahayag sini, nagatrabaho man sila sang insakto apang ini pa sa karun ang balik sa ila.
Samtang, nasweldohan na ang apat ka mga security guard nga nagpadulong man sa estasyon sang Bombo Radyo Bacolod matapos magreklamo nga wala nasweldohan sang Stelsen Security Agency.
Sila nagpadulong sa estasyon sang Biyernes kag kaina sang aga nagsulod na sa ila bank account ang ginapangayo nila nga sweldo apang wala sang may ginpadala nga payslip.
