Natalana nga pasakaan sang kaso ang duha ka mga lalaki nga ginatudlo nagtuga sang sunog sa Java Pension House sa corner Gonzaga-Locsin Streets, ciudad sang Bacolod kun sa diin anom ang patay.
Madumduman nga ang mga suspetsado nga sanday Rodolfo Inson alyas Onyok, 23-anyos sang Libertad Market, Barangay 40, Bacolod City; kag Venancio Valeriano alyas Noy Lumot, 27-anyos sang Purok Kalubihan, Barangay Amayco, Murcia ang nadakpan sa pagbuligay sang Bacolod Police Station 1 kag Murcia Municipal Police Station kahapon sang aga.
Si Inson ang nadakpan sa Barangay 27, Bacolod City samtang nadakpan sa Purok Kalubihan, Barangay Amayco, Murcia ang kaupod sini nga si Valeriano.
Sa interview sang Bombo Radyo kay Police Major Jovil Sedel, commander sang Police Station 1, ginkompirmar sini nga natalana nga pasakaan sang kaso nga arson with multiple homicide and multiple physical injury si Inson kag Valeriano kag ang isa pa gid ka suspect nga wala pa nadakpan.
Gindugang niya man nga pasakaan man ang mga ini sang kaso nga theft bangud sa pagkawat sang helmet sang motorsiklo.
Suno kay Sedel, may yara na sang kaso nga pagpangawat kag illegal gambling si Valeriano sadto samtang si Inson naman ang may record man sang kaso nga theft.
Suno sa hepe, ginapreparar na sang Bureau of Fire Protection ang pagpasaka sang kaso kag may yara sila sang 36 ka oras halin sa pag-aresto sa mga suspetsado agud mafile ini.
Padayon man ang operasyon sang Police Station 1 agud madakpan ang isa pa gid ka suspect.
Ginatinguhaan na karun sang Bureau of Fire Protection (BFP) Bacolod nga matapos na ang tanan nga kinahanglanon nga mga dokumento agud mapasakaan na sang kaso nga arson ang mga suspetsado nga nagpangawat sa Java Pension House nga gintunaan sang sunog nga nagresulta sa anom nga patay.
Ini ang ginpahayag ni Bacolod City Fire Marshal, Fire Chief Inspector Publio Ploteña matapos nga nadakpan na ang duha sa tatlo ka mga suspetsado sa pagkawat sang motorsiklo sa groundfloor sang pension house.
Suno kay Ploteña, ginatapos na lang nila ang statement sang mga testigo agud tigayon na nga mapasaka ang kaso batok sa duha.
Samtang ginpahayag naman sang hepe sang Murcia Municipal Police Station nga si Police Major Robert Dejucos, nga insigida nila nga gintutukan ang pag-aresto sa mga suspetsado.
Nahisayran diri nga sang natabo ang sunog Martes sang kaagahon, gilayon sila nga ginhatagan sang impormasyon sang Bacolod Police Station 1 pagka-aga tuhoy sa mga suspetsado.
Nahibaluan nga ihado sa kasal ni Dejucos ang tag-iya sang pension house nga nalakip sa nagkalamatay sa sunog nga si Christopher Java.
