Kada isa sa atun ang may ginakahuyugan, ang iban ang paglantaw sang mga romantic comedy, dramas, pagbasa sang nobela, fictional series kag ang iban naman ang pagkolekta kag pagbasa sang comics.
Pila sa atun ang nagapangakig kun madisturbo ang atun ginalantaw ukon mahaboy ang atun nga mga ginabasa nga libro ukon comics.
Apang paano kun ang atun pinalangga nga iloy ang nagpanghilabot sa atun mga collection? Imo man bala ini ipapriso?
Kaangay lamang sang isa ka 20-anyos nga soltero sa Taiwan nga mahuyugon sa pagtipon sang mga comics.
Nagapuyo ang lalaki kaupod sa iya 64-anyos nga iloy sa Chiayi City, Taiwan.
Natak-an na ang nanay bangud nga naga-damo nga naga-damo ang comic collection sang iya anak, kag pamatyagan niya naga-gutok na ang ila balay.
Isa ka adlaw, samtang nagapanglimpyo ang iloy, nakit-an sini ang 32-volume nga “Attack on Titan” manga collection sang iya bata.
Nanotisyaran sini nga ang iban sa comics ang daan na kag nabasa pa ang mga libro gani ginrecycle niya ini kag ginhaboy ang iban agud nga magligwa ang balay.
Wala na siya naglisenya sa iya bata kun okay lang nga irecycle , gani nga sang nag-abot ang bata, amo na lang ang kaakig sini sa iya nanay.
Sa sobra nga kalain sang buot sini, nagpatawag pa siya sang police.
Sang ulihi, indi pa gid madala sa istorya ang bata, kag ginpasaka pa gid sini sa korte ang reklamo bangud suno sa iya, ginguba ang iya propedad nga wala sang pahanugot halin sa iya.
Santo sa argumento sang bata, ang “Attack on Titan” ang isa ka tuman ka popular nga manga gani mabudlay na makapangita sang kumpleto nga collection bangud wala na gani sang print sang 32 volumes bangud makabig na ini nga collectors’ items.
Apang rason naman sang iloy nga nabasa naman ang manga volumes kag nagapagutok lang sa ila balay.
Nagpahayag pa ini nga kun mahimo, istoryahan na lang nila ini nga duha apang nagpamalibad ang bata.
Pebrero pa natabo ang insidente apang karun lamang nagpagwa sang desisyon ang Chiayi District Court.
Ginmultahan ang nanay sang 5,000 Taiwanese dollars ($160 ukon masobra P8,900) bangud sa property damage.
Suno sa korte, indi insakto nga wala ginrespeto ang property rights sang iya anak.
Ginpahayag man nga tubtob subong, nagalain sagihapon ang buot sang bata kag wala ini sang gana nga magpakig-istorya sa iya iloy matapos ang ginhimo sa iya paborito nga manga collection.
