Nagdangat sa 20 ka indidibidwal ukon anom ka pamilya ang gin-evacuate sang Special Rescue Force sang Bureau of Fire and Protection sa bulig sang Mountain Tigers Search and Rescue-Bacolod sa Barangay Taculing, ciudad sang Bacolod kaina sang kaagahon.
Sa interview sang Bombo Radyo Bacolod kay Fire Officer 3 Arnel Chavez, deputy commander sang SRF Negros Occidental, nag-una sila responde sa Barangay Bata bangud may nagpangayo sang bulig matapos nga magsaka ang tubig.
Una naman nga nagresponde ang Mountain Tigers Search and Rescue sa Barangay Taculing matapos nga magsaka ang tubig sang tatlo ka metros ukon isa ka panalgan sang balay.
Bangud sa kadakuon sang tubig sa Taculing River, nangalihid ang mga rescuers sa likod sang CENECO agud nga makasulod sa lugar sang mga residente nga gin-evacuate kun sa diin ang mga balay ang nakatungtong sa pangpang sang suba kag nagshort cut sa Bacolod Girls Home agud nga makagwa bangud indi na maagyan ang taytay sa suba.
Wala man sila naghatag sang kompyansa apisar nga madasig lang ang pagsubside sang tubig.
Wala naman sila sang iban nga barangay nga ginpangrespondehan kag wala man sang reported nga nagkalaanod.
Ang SRF Negros Occidental ang nagasakop sang bilog nga probinsya kalakip na ang syudad sang Bacolod.
Well equipped naman sila kag makasarang sa pagresponde sa high angle rescue sa baha, sunog kag iban pa nga search and rescue operations.
Sa tion naman sang mga emergencies, sarang sila nga macontact sa numero nga 0915 528 2494 ukon 0968 329 2569.
