20 ka Barangay sa ciudad sang Bacolod ang mahatagan sang electric vehicle subong nga tuig.
Sa interview sang Bombo Radyo Bacolod kay Bacolod City Lone District Representative Alfredo “Albee” Benitez, ang magapondo sa procurement amo ang national government.
Pahayag sini nga ginalantaw nila ang amat-amat nga transition sa public transportation gikan sa traditional fuel-driven vehicle padulong sa e-vehicle.
Panindugan ni Benitez nga nakita na ang benepisyo sang e-vehicle partikular na sa mga ebike, gani wala sang rasun nga padugayan pa ang transition.
Ilabi na sa karun nga may oil crisis kag indi mapaktan ang hinali nga pagsaka sa presyo sang gatong.
Samtang sa e-vehicle, mas manubo ang makonsumo nga kuryente kun basihan ang distansya kun ipaanggid sa makaon nga gatong.
Dugang pa nga mas manubo ang maintenance cost sa e-vehicle.
Apang bangod 20 lamang ang maprocure, sila ang nagpatigayon sang draw lots sa mga Barangay nga makabatun.
Ang budget ang kapin P30 million, samtang kun madugangan ang budget, mahimo nga mahatagan man ang iban pa nga Barangay.
Suno kay Benitez, ang baklon nga e-vehicle ang indi awto kundi kaangay sang utility van agud magamit gid sang Barangay.
Pahayag sini nga kun awto ang baklon, mahimo nga ini ang dal-on sang Punong Barangay.
Samtang kinahanglan man nga matrain ang driver sa paggamit sang e-vehicle agud indi madasig nga maguba.
