20 ka electric bike ang ginrelease kaina sang Bacolod Traffic Authority Office bangud nakabayad na sila sang multa matapos nadakpan nga nagbyahe sa national highway.
Sa interview sang Bombo Radyo kay BTAO head Police Major Junji Liba, resulta ini sang operasyon kahapon kun sa diin madamo ang nadakpan nga yara sa national highway bisan indi sila sarang nga makabyahe diri kag sa interior streets lamang.
Antes ginrelease ang e-bike, mismo si Liba ang nag-orient sa mga nagapanag-iya nga indi magbyahe sa national highway.
Aminado si Liba nga madamo na gid ang nagareklamo nga yara na sa mga merkado ang mga e-bike.
Naintindihan man sang mga driver ang paathag sa ila kag nagpasalig nga indi na magliwat.
Suno kay Liba, dapat nga mamangkot anay ang e-bike driver kun ano nga sahi sang dalan ang ila nga labayan agud nga indi maglapas.
Sa 2nd offense, doble na ang multa nga ila balayran samtang indi na magawad ang e-bike kun makatatlo na ka beses nga nadakpan nga nagviolate.
Suno sa BTAO head, wala pa sila sang imbentaryo sang e-bike sa Bacolod bangud indi man ini rehistrado sa Land Transportation Office.Samtang…ginpasalig sang pinuno sang Bacolod Traffic Authority Office nga ginatutukan ang mga electric bike nga nagabyahe sa national highway sa ciudad bangud ini ang ginadumilian.
Suno kay BTAO head Police Major Junji Liba, aminado ini nga madamo na ang e-bike nga nagabyahe subong bangud affordable ini kag mahapos ibyahe bangud indi na kinahanglan nga magsikad, apang magamit gid sa pangabuhian.
Suno kay Liba, ginakampanya sang BTAO nga indi sila makabyahe sa national highway.
Ang electric bike suno kay Liba ang nagatuga sang paggutok sang dalagan sang trapiko gani indi sila pwede sa national highway.
Suno diri, indi makabig nga motorized vehicle ang mga e-bike gani wala sang layi nga nagacover sa ila nga pwede sila makabyahe sa mayor nga dalanon kundi sa interior streets lamang.
Gin-athag ni Liba nga wala sila ginadumilian nga magbyahe kundi ila lang nga likawan ang national highway.
