Preparado na 20 ka miyembro sang Special Rescue Force sang Bureau of Fire Protection Negros Island Region nga una nga gindeploy agud magbulig sa biktima sang linog sa Cebu, sa deployment naman sa Davao Oriental.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bacolod City Fire Station, sa 20 ka fire personnel, apat diri ang gikan sa Bacolod City samtang ang iban ang gikan sa Negros Occidental, Negros Oriental kag Siquijor.
Sila ang naglabay sa nanarisari nga training kaangay sang Collapse Structure Search and Rescue (CSSR) kag Urban Search and Rescue (USAR), samtang kun matapos na ang search and rescue operations, sila ang may training man sa Humanitarian and Disaster Response (HADR) nga mahimo mabulig.
Suno kay Masip, ginahulat na lamang nila ang go signal gikan sa BFP National Headquarters kun palakton na ang team.
Dala sang mga ini ang tatlo ka mga vehicles lakip na ang isa ka Collapse Structure Search and Rescue Truck.
