Ipaidalum pa sang Negros Occidental Provincial Government sa confirmatory test ang mga nagpositibo nga urine samples sang 20 ka mga empelyado sang Provincial Government sa ginpatigayon nga random drug test.
Madumduman nga sa una nga anunsyo, walo ang mga nagpositibo apang may masobra 20 pa nga gray areas.
Natukiban naman nga 20 ka mga empleyado ang nagpositibo, apang ginpahayag ni Negros Occidental Governor Eugenio Jose “Bong” Lacson nga wala pa napagwa kun pila ang casual, job order ukon regular employees.
Suno diri, nagrepeat order na ang Provincial Government sang mga test kits para sa confirmatory test kag ginalauman nga ini ang mag-abot sa masunod nga semana.
Samtang mahimo nga sa una nga semana naman sang Enero maggwa ang resulta sang confirmatory test.
Pahayag ni Lacson nga matapos na ang contrata sang mga job order kag casual employees sa katapusan sang Desyembre, gani ang mga nalakip sa gintest ang ihold anay kag kun positibo ang resulta, ini ang indi na ihire sa Provincial Government.
Sa pihak nga bahin, ang mga regular employees nga magpositibo ang mahimo naman magpangatubang sang administrative cases.
Apang pasalig sang gobernador nga indi pa alarming ang numero bangod ang 20 ka mga nagpositibo ang halos dos porsyento lamang sang kabug-usan nga workforce.
Pasalig sang gobernador nga ang mga nagpositibo ang mangatubang sang konsekwensya bunga sang ila nangin desisyon.
