Nagdangat na sa indi magnubo 20 ka mga persona ang nagkalamatay bangud sa paglaslas ni Severe Tropical Storm Kristine kun sa diin stranded sa gihapon ang mga residente bangud sa pagbaha sa Bicol Region.
Suno kay regional police chief BGen. Andre Dizon, sa bilog nga Bicol Region, nagdangat na sa indi magnubo 20 ang nagkalamatay apang wala pa nafinalize ang nasambit nga numero.
Suno sa iya, kalabanan sa mga ini ang nagkalalumos ukon nalubong sa landslides.
Sa Naga City kag banwa sang Nabua, ang mga rescuers ang nagagamit sang bangka agud malab-ot ang ga residente nga stranded gihapon sa mga atop.
Suno kay Bicol police spokeswoman Luisa Calubaquib, sila ang nagpangayo sang bulig paagi sa Facebook posts rason kun ngaa ginkadtuan nila ang mga ini.
Suno sa National Disaster Risk Reduction and Management Council, masobra duha ka million ka mga persona ang naapektuhan ang Bagyo Kristine nagikan sa Ilocos, Cagayan Valley, Calabarzon, Mimaropa, Bicol Region, Western Visayas, Central Visayas, Eastern Visayas, Zamboanga Peninsula, Caraga, Bangsamoro Autonomous Region in Muslim Mindanao kag Cordillera Administrative Region.
Kalabanan sa mga naapektuhan ukon kapin 1.67 million ang nagikan sa Bicol Region.
