20 sa 32 ka mga pamilya nga residente sang Purok Lampirong Barangay 2, Bacolod City nga ginpapanaugan sang notice to vacate sang ciudad sang Bacolod ang naawardan na sang Bacolod Housing Authority sang ila nga masayluhan.
Sa interview sang Bombo Radyo Bacolod kay Punong Barangay Imelda Banguanga, kabug-usan nga 28 sa 55 ka mga informal settlers ang naawardan na sang ila masayluhan kag 20 diri ang gikan sa 32 nga ginpapanaugan sang notice to vacate bangud ang mga balay sang mga ini ang yara na sa Mambuloc Creek.
Suno kay Banguanga, naeksplikaran naman ang mga ini nga mag-amat amat na panghimos kag idemolish ang mga puluy-an apang ginahulat pa sang mga ini ang financial assistance para sa ila nga pagsaylo.
Samtang pito naman sa walo nga una na nga naawardan sang ila nga relocation site ang nakahalin na sa nasambit nga lugar apang ang isa ang nag-ayo nga tubtob sa Hulyo ini magapuyo sa ila balay.
Ginpahayag man sini nga ang 12 gikan sa 32 nga nabilin ang nagaproseso man sang ila papeles apang may yara sa mga ini nga indi qualified kag ang anum diri ang gina-evaluate pa sang Bacolod Housing Authority ang ila nga mga papeles bangud ginasiguro man sang mga ini nga kwalipikado ang maawardan.
Ginapadali man sang punong barangay nga mahikot na ang papeles sang mga masayluhan sang mga residente nga ginpanaugan sang notice to vacate bangud sila ang ginapressure man agud nga mapatuman na ang proyekto sang gobyerno.
Nagpasalig man ang Department of Public Works and Highways (DPWH) nga magahatag ini sang truck agud nga magtransport sang mga apektado nga mga residente nga naawardan sang masayluhan sa Purok Arao sa Barangay Vista Alegre.
Ginpahayag man sang punong barangay nga magapatawag ini liwat sang meeting kag willing man ang mga apektado nga mga residente nga magsaylo sa lugar nga ginhanda sang syudad para sa ila.
