Plano sang otoriad sang Zimbabwe nga ihawon ang 200 ka mga elepante agud nga ipakaon sa mga tawo nga naga-eksperyensya sang kagutom bangod sa tig-ilinit.
Dugang pa gid sa epekto sang El Nino, wala napuslan ang mga pananum sa southern Africa kun sa diin kapin sa 68 milyon ka mga tawo sa rehiyon ang apektado.
Suno kay Tinashe Farawo, Zimbabwe Parks and Wildlife Authority spokesperson, ginkumpirmar sini nga ila ihawon na lamang ang 200 ka mga elepante sa pungsod kag nagapangita na sa karun sang modalities nga mahimo ini.
Suno diri, iga-panagtag ang karne sang mga elepante sa mga komunidad sa Zimbabwe nga apektado sang tuman ka init.
Masobra sa 200,000 ka mga elepante ang yara sa conservation area sa lima ka pungsod sa southern Africa nga ginalakipan sang Zimbabwe, Zambia, Botswana, Angola kag Namibia, kag ang rehiyon ang may pinakamadako nga populasyon sang elepante sa bug-os nga kalibutan.
Suno kay Farawo, ang himuon nga pagpatay sa mga elepante ang pamaagi agud nga mabuhinan ang mga higante nga sapat sa iya parke nga maka-akomodar lamang sang 55,000 elephants.
Bangod sa tuman ka init, masami nga naga-engkwentrohanay ang mga tawo kag mga elepante sa pagpangita sang pagkaon.
Tinalikdan nga tuig, 50 ka mga persona ang napatay sa Zimbabwe bangod sa pagpang-atake sang elepante.
