Naghatag sang mensahe si Bacolod City Mayor Greg Gasataya sa 202 ka mga bag-o nga ginkasal sa ginpatigayon nga mass wedding kahapon sang hapon, Pebrero 14 sa Activity Center sang Bacolod City College kadugan sa Valentine’s Day
Suno kay Gasataya, indi hapos ang proseso sang seremonya nga ginapatigayon sang Bacolod City Government agud mahatagan sang libre nga kasal kag sa paghatag sang legal standing sa pagakaslunon.
Pangamuyo sang Alkalde nga bendisyunan kag mangin madinalag-on ang paga-updanay sang tagsa ka bag-o nga mag-asawa.
Ginpaathag sini nga ang pinaka-importante sa isa ka relasyon amo ang respeto.
Suno diri, indi buot silingon nga bangud mag-asawa na, madula na ang respeto sa isa kag isa kag pahayag sini nga dapat ini ang magpadayon bisan ano nga oras kag ano nga lugar bangud ang respeto ang magapabakod sang pag-updanay sang kada mag-asawa.
Pahayag ni Gasatya nga paagi sini nga seremonya, ang mag-asawa ang mangin isa, kag ang isa ka desisyon sa pamilya ang dapat nga panindugan.
Ginpasalamat man sang alkalde ang pamilya kag mga tawo nga nagbulig kag naghatag sang suporta agud mangin madinalag-on ang seremonya.
