Aprubado na sang Sangguniang Panlalawigan ang kapin P4.3 billion nga annual budget sang Negros Occidental para sa 2020.
Nahibaluan nga kalakip na diri ang P121.9 million nga pondo para sa Economic Enterprise Development Department.
Sa session sang SP sang Miyerkules, una ini nga ginpasulod sa agenda ni Board Member Rommel Debulgado nga chairman sang committee on finance and appropriations sa second reading antes ginduso sa third and final reading.
Suno kay Vice Governor Jeffrey Ferrer, nangin madasig ang pag-aprubar sa annual budget bangud wala sang may nagpamalabag diri.
Suno diri, nangin maid-id na nga daan ang pagtalakay sa budget deliberation sa kada departament kag division heads.
Nahibaluan nga mas mataas sang P202 million ang budget sa 2020 kun ipaanggid sa P4 billion nga pondo sini nga tuig.
Samtang, lano karon sang hospital operations departament nga magdugang sang bed capacity sa apat ka mga district hospital sa Negros Occidental.
Suno sa pinuno sang hospital operations departament nga si Dr. Leonardo Eusebio, natalana nga ipresentar ini sa pagsinapol sang Provincial Health Board nga ginapangunahan man ni Governor Eugenio Jose Lacson antes ipasa sa Sangguniang Panlalawigan.
Suno kay Eusebio, himuon nga 500 bed capacity ang Teresita Jalandoni Provincial Hospital sa ciudad sang Silay, 300 bed capacity ang Cadiz District Hospital kag Lorenzo Zayco District Hospital sa ciudad sang Kabankalan kag 200 bed capacity naman ang Valladolid District Hospital.
Ginpasalig man ni Eusebio nga dugangan man ang facilities kag personnel sang apat ka mga ospital paagi sa pondo sang Department of Health sa idalom sang Universal Health Care Law.
Suno diri, nagadako ang populasyon sang probinsya gani nagakinahanglan man pasakaan ang bed capacity kag ang mga pasilidad agud makahatag sang mas manami nga serbisyo.
