Ginalauman sang pinuno sang Committee on Finance and Appropriations sa Sangguniang Panlungsod nga mapasar na sa masunod nga semana ang P2.6 billion nga budget sang Bacolod City para sa 2021.
Sa interview sang Bombo Radyo kay Councilor Cindy Rojas, ginpahayag sini nga napasar na sa first reading ang 2021 Annual Budget sang ciudad kag sa masunod nga semana, suguran na ang committee hearing.
Suno kay Rojas, nagalaom ini nga sini nga bulan matapos na ang tanan nga hearing.
Suno diri, ginblock off ang schedule sang SP sa sulod sang duha ka semana agud kun matapos ang 1st reading, mapasulod ini gilayon sang 2nd reading.
Aminado man ini nga madamo ang requirements bangud may yara sang 20 tubtob 30 ka mga departamento ang Bacolod Government Center kag halos tanan diri nagnubo ang budget kun ikumparar sa 2020 magluwas lang sa City Health Office nga kinahanglanon sa pagpakigbato sa COVID-19 pandemic.
Madumduman nga ginkumpirmar man ni Bacolod City Mayor Evelio “Bing” Leonardia sang tinalikdan nga nagnubo sang 13% ang 2021 annual budget sang ciudad kun sa diin nagikan sa P3 billion sang tinalikdan nga tuig, yara na lang ini sa P2.6 billion.
