Ginpasalamatan ni Negros Occidental Governor Eugenio Jose �Bong� Lacson ang Sangguniang Panlalawigan sa idalum sang liderato ni Vice Governor Jeffrey Ferrer sa pag-aprubar sang proposed budget sang probinsya para sa masunod nga tuig.
Kahapon, gin-aprubahan na sa third and final reading sa SP ang kapin P4.5 billion nga 2021 budget sang probinsya.
Ini ang mas mataas sang masobra 200 million pesos kun ipaanggid sang tinalikdan nga tuig.
Ang pondo ang ginalakipan sang 4.47 billion pesos nga general fund kun sa diin 1.64 billion pesos ang napain para sa personal services ukon sweldo sang mga empleyado, 1.37 billion pesos nga maintenance and other operating expenses, 12 million pesos nga capital outlay kag 1.44 billion pesos nga special purpose appropriations.
Ang sources sang pondo ang ginalakipan sang 3.99 billion pesos nga internal revenue allotment, 98 million pesos nga tax revenues kag 380 million pesos nga non-tax revenues.
Sa interview sang Bombo Radyo kay Lacson, tuman ang pagpasalamat sini sa SP sa pag-aprubar sang budget kag ginpahayag nga dako ini nga bagay bangud luyag sang tanan nga local chief executives nga sa pagsugod sang 2021, may pondo na sila nga nakaptan.
Suno sa gobernador, indi kaangay sang nagligad nga tuig nga ang maintenance and other operating expenses sang tagsa ka departamento nagapaabot pa sang supplemental budget, suno sa iya, sa 2021, pagakatapos sang MOE, halos kumpleto na ang mga kinahanglanon.
Gindugang man sini nga sa pondo sang probinsya, 20% sang development fund ukon kapin P200 million ang gin-alokar para sa infrastructure projects ukon pagpakay-o sang mga dalanon.
