Nadugangan kahapon sang 21 ang kaso sang COVID-19 sa probinsya sang Negros Occidental samtang anom naman ang nagdugang sa ciudad sang Bacolod.
Sa COVID-19 case bulletin no. 136 nga ginpagwa sang Department of Health (DOH) Region 6, nagdangat na sa 2,130 ang kabug-usan nga kaso sang COVID-19 sa Western Visayas.
1,063 naman sa mga ini ang aktibo nga kaso sa pagdugang sang 84, 1,035 ang mga recoveries sa pagdugang sang 42 kag nagdangat na sa 32 ang mga nagtaliwan sa pagdugang sang isa.
Ang panibag-o nga narecord nga nagtaliwan tuga sang virus amo ang 48 anyos nga lalaki nga residente sa ciudad sang Bacolod.
Ang anum ka narecord sang Bacolod ang lunsay mga local cases kun sa diin tatlo diri ang nakahome quarantine, duwa ang nakafacility quarantine samtang may-isa naman nga naka-admit sa ospital.
Nagdugang naman ang onse ka mga local cases sa probinsya sang Negros Occidental nga ginalakipan sang pito ka mga nakafacility quarantine kag apat nga nagapaidalum sa home quarantine.
Samtang siyam naman ang nagpositibo nga LSI kag isa ang nagpositibo nga returning overseas Filipino (ROF) nga lunsay nakapaidalum sa facility quarantine.
Sa karun, ang Bacolod City ang nakarecord na sang kabug-usan nga 384 ka mga kaso sang COVID-19 samtang nagdangat naman sa 677 ang kaso sa probinsya sang Negros Occidental.
