32 ka putos sang dried marijuana leaves kag isa ka dako nga dried marijuana stalk ang nakumpiskar sang Regional Police Drug Enforcement Unit (RPDEU) sa ginpatigayon nga buybust operation sa Purok Bangrus, Barangay 1 ciudad sang Bacolod, Miyerkules sang hapon.
Ginkilala ang subject sa operasyon nga si Gideon Ulyssis Nava, 21-anyos.
Sa interview sang Bombo Radyo Bacolod kay Lt. Castillo, team leader sang RPDEU, ginpahayag sini nga natigayon nila nga nabaklan si Nava sang marijuana nga nagabalor sang P500 kag nakumpirmar nga may dalagko ini nga stocks gani ila ginpatigayon ang buybust operation.
Magluwas sa suspetsado, naabtan man sa lugar ang apat ka iban pa nga mga persona nga padayon sa karon nga gina-imbestigaran.
Suno kay Lt. Castillo, front lamang ni Nava ang ginapanag-iyahan sini nga bilyaran kag kalan-an agud makabaligya siya sang marijuana.
Sa kabug-usan, nagadangat sa 40 grams ang narekober nga marijuana nga ginabanta nagabalor sang kapin P50, 000.
Samtang, aminado naman ang amay sang suspetsado nga si Dino Nava nga nakahibalo siya nga nagagamit sang marijuana ang iya bata.
Apang, wala siya maglaom nga nagaduso pa gid ini.
Dugang pa sang amay nga makapila ka bes niya naman nga ginsaway si Gideon nga untatan na ang iligal nga buluhaton.
