Patay ang 21 anyos nga 3rd year College student nga babayi matapos maguyod sang motorsiklo nga ginsipa sang wala makilal-an nga persona sa National Highway nga sakop sang Barangay Magallon, sa banwa sang Moises Padilla.
Ang biktima ang ginkilala nga si Deserie Bajar Tadena, 21 anyos, 3rd year student sa kurso nga Bachelor of Science in Elementary Education sa Central Philippine State University.
Sa interview sang Bombo Radyo Bacolod kay Moises Padilla Municipal Disaster Risk Reduction and Management Office Head Reynald Horegue, ang biktima ang ginsugat sang iya tiyo nga si Joear Bajar sa eskwelahan.
Apang sila ang temporaryo nga nagdulog sa kilid sang dalan bangod nagpangihi ang tiyo.
Suno kay Horegue, sa ila paghinun-anon sa tiyo, ginpahayag sini nga nabalikdan niya nga naglabay ang motorsiklo kag ginsipa sang driver ang manubela sang iya nakaside stand nga motorsiklo.
Gin-athag man ni Bajar nga naga-andar ang iya motorsiklo apang nakaneutral.
Ginalantaw nga mahimo sang pagtumba, natandog kag nagsaka sa primiera ang kambyada gani ini ang nagwild kag nagtiyog-tiyog.
Suno kay Horegue, nakita sang tiyo nga ginadusdos sang motorsiklo ang iya hinablos gani gilayon niya man ini nga ginlumpatan agud mapuga ang clutch kag mapapondo ang motorsiklo, kun sa diin si Bajar ang nakaangkon man sang mga bakiras sa kamot.
Pahayag sang MDRRMO official nga wala man sang makita nga outside wound ang biktima, apang ini ang may bukol sa likod nga bahin sang ulo.
Bangod may CCTV Camera sa proper, kun ini ang matsekyar, ginpahayag sang tiyo nga mahimo makilala niya ang motorsiklo nga naglabay.
Sa facebook post naman ni Moises Padilla Vice Mayor Ian Villaflor, sakay sa blue nga KLX nga motorsiklo ang suspetsado, mataas kag may tattoo sa abaga.
Panawagan sang bise alkalde nga kun may makakilala, ini ang ireport agud mahatagan hustisya ang kamatayon sang estudyante.
