Ginpanginwala ni Jonathan Divinagracia sang Barangay 2, ciudad sang Bacolod nga siya ang nagpatay sa tatlo ka mga biktima sang shooting incident sa ciudad sang tinalikdan nga tuig bisan priso na ini sa karon sa Bacolod Police Station 1 matapos ginserbehan sang mandamiento de aresto sang Enero 21 sa kaso nga murder.
Si Jonathan Divinagracia ang ginserbehan sang warrant of arrest sa isa ka pension house sa ciudad sang Bacolod paagi sa gintingob nga pwersa sang Bacolod Police Station 1 kag Mobile Force Company.
Si Divinagracia ang ginatudlo nga suspetsado sa tatlo ka shooting incident sa Bacolod sang nagligad nga tuig nga ginalakipan nanday Elmar Gayatin sang Pontevedra nga ginpatay sang December 25, 2021; Donald Joseph Casiano sang Barangay Granada; kag Dionard Esquilla sang Purok Sigay, Barangay 2, Bacolod City, apang isa pa lang ka count of murder ang napapanaugan sang warrant of arrest.
Si Divinagracia ang may upod nga si Ethy Javier apang nadakpan ini sang bulan sang Agusto tuig 2022 kag yara na sa karon sa detention facility sang BJMP.
Ginapahayag nga si Divinagracia ang ginatudlo nga shooter samtang si Javier naman ang spotter.
Sa interview sang Bombo Radyo kay Divinagracia, 21-anyos, gin-ako sini nga siya ang nagagamit kag nagabaligya sang illegal nga druga agud may isagod sa iya nga isa ka bata kag ginikanan.
Subong nga ara na ini sa prisuhan, ginpanginwala ni Divinagracia nga siya ang nangtiro sa mga biktima kundi iya ginpanindugan nga ginpasibangod lang ini sa ila.
Suno diri, nabatian niya ang ngalan nga Bulljack Jamantoc apang wala ini nakahibalo kun taga-diin si Jamantoc.
