Nakahunong na sa Talisay City Police Station ang Grade 10 student sang Rafael B. Lacson Memorial High School nga nakuhaan sang granada kag isa ka sachet sang suspected marijuana.
Sa interview sang Bombo Radyo kay Police Lt. Abegael Donasco, Deputy Chief of Police sang Talisay City Police Station, ginkilala ang suspek nga si Bronson Lucas Lacson, 21 anyos, residente sang Zone 6, syudad sang Talisay.
Suno kay Donasco, nakabaton sila sang tawag nagikan sa punong barangay nga may isa ka trasikad driver nga nag-report sa barangay nga ini siya ang ginpahog nga lampusan sang granada sang amo nga suspek matapos nga sila ang naglalis.
Bangud sini, nagreport ang sikad driver sa barangay kag ang barangay naman amo ang nag-report sa pulis.
Gilayon nga nagpadulong sa eskwelahan ang mga utoridad kag didto ila na-intercept ang suspek sa diin ang granada iya ginbutang sa sulod sang iya briefs samtang ang marijuana nakuha naman matapos nga ginpabuklad ang iya kamot bilang kabahin sang ila nga standard operating procedure.
Suno kay Donasco, wala pa mahibaluan kun ini ang nagagamit sang illegal nga druga.
Suno diri, ini ang una nga kahigayunan nga may nakuha nga granada sa isa ka estudyante apang may mga kaso naman sila sang nagililigad nga nakuhaan sang marijuana nga nagabug-at sang isa ka gramos kag nagabalor sang P120.00.
Ginpahayag man sini nga pasanyugon pa sang Talisay City Police Station ang ginapatigayon nga police visibility sa eskwelahan.
Suno kay Donasco, tatlo ka mga kaso ang mahimo ipasaka batok sa suspek nga lakipan sang grave threat, paglapas sa RA 9516 ukon illegal possession of explosives kag RA 9165 ukon Comprehensive Dangerous Drugs Act of 2002.
Suno kay Donasco, nagpangayo man sila sang bulig nagikan sa Explosive Ordnance Division agud nga magtsekyar sang eskwelahan kag madeklarar nga clear na kag hilway na makabalik diri ang mga estudyante.
Nakahatag naman ang Talisay City Police Station sang report sa Negros Occidental Police Provincial Office (NOCPPO) angot sa narekober nga granada sa isa ka estudyante.
Nagpanugyan man ini sa mga ginikanan nga giyahan sang maayo ang mga kabataan agud nga malikawan ang pareho nga insidente kun sa diin nakuhaan sang granada kag marijuana ang isa ka estudyante.
Dugang pa sini nga sabaylo nga mabuyo sa iban nga bagay ang mga bata, mahimo ang mga ini engganyuhon nga maghampang sang nanari-sari nga sports.
