Ginahulat pa ang resulta sang drug test nga ginpatigayon sa 21-anyos nga Grade 10 student sang Rafael B. Lacson Memorial High School nga nakuhaan sang granada, isa ka sachet sang marijuana kag tooter kahapon.
Sa interview sang Bombo Radyo kay Police Lt. Abegael Donasco, Deputy Chief of Police sang Talisay City Police Station, ginpaidalum sa drug test si Bronson Lucas Lacson, 21 anyos, residente sang Zone 6, ciudad sang Talisay.
Nadala naman sa explosives division sang Negros Occidental Police Provincial Office (NOCPPO) ang granada agud itest kun ini ang nagagana pa.
Suno kay Donasco, wala pa napadalman ang imbestigasyon kag ila pa pagaistoryahon ang suspetsado.
Wala pa man nakapalapit ang pamilya ni Lacson sa estasyon.
Suno diri, sa karun ila pa ginaproseso ang mga papeles kag dokumento nga kinahanglanon agud matigayon ang nagkalain-lain nga test kasubong man ang mga bayolasyon.
Suno kay Donasco, ila pa ginahibalo ang rason kun ngaa may granada ang suspetsado.
Suno diri, non-bailable ang kaso sini bangud siya ang nakuhaan sang explosive.
