Patay ang 21 anyos nga lalaki matapos gintiro sa Prk Sapa, Sitio Nacab, Brgy Bubog, Talisay City alas-11:00 kagab-i.
Ang biktima ang ginkilala lamang nga si Alyas Marko, 21 anyos, single, construction worker, kag residente sa lugar.
Sa inisyal nga imbestigasyon sang Talisay City Police Station, samtang yara sa sulod sang ila balay, nabatian sang biktima ang pagginu-al sang mga ido gani gingwaan niya ini agud makumpirmar kun may tawo.
Samtang ginaflashlight ang palibot, nagsunod man sa iya ang amay kag ang iya manghod.
Tubtob nga nagmensyonar ang manghod nga may nakita ini nga tawo nga nagapanago sa likod sang puno sang kahoy.
Ini ang gina-alegar nakasuksok sang orange nga panapton.
Apang hinali na lamang nila nabatian ang sunod-sunod nga lupok sang armas-luthang gani sila ang nagdalagan agud makapanago.
Si Marko ang wala nangin mapalaron kag nag-agom sang pila ka igo sang bala.
Gindala pa ini sa Talisay City Health Office apang gindeklarar nga Dead on Arrival alas-4:15 kaina sang kaagahon.
Narecover sang Scene of the Crime Operation (SOCO) sa crime scene ang anom ka basiyo sang caliber .45 ammunition, kag isa ka fired bullet.
Sa karun padayun pa nga ginatumod ang motibo sa krimen.
