Patay ang 21-anyos nga rider matapos gintiro sang isa ka tricycle driver sa Hacienda San Antonio, Brgy. Mabini, Cadiz City, alas-3:15 kaina sang hapon.
Ginkilala ang biktima nga si Jay Roze, lalaki nga residente sang Hacienda San Fiel, Brgy. Mabini, Cadiz City.
Samtang ang suspect amo si alyas “Eddie”, lalaki, 42 -anyos kag residente sang Hacienda San Antonio sa nasambit nga brgy.
Sa interview sang Bombo Radyo kay PLt. Col. Lymel John Pasquin, hepe sang Cadiz City Police Station, samtang nagamaneho si Roze sang iya motorsiklo angkas ang isa menor de edad, nag-overtake ini sa suspect.
Gani, nag-overtake man si alyas “Eddie” sa biktima tubtob nga nag-binaisay sila nga duha.
Bangud sini, gintiro sang suspect si Roze kag na-igo sa dughan nga nagresulta sang iya kamatayon.
Gilayon naman nga nagpalagyo ang suspect matapos ang krimen.
Sa karon, suno kay Pasquin, padayon ang ila hot pursuit operation sa pagdakop sa suspect.
