BACOLOD CITY — 21 ka mga balay ang gintupok sang kalayo sa sunog nga nagluntad sa Purok Kabukiran, Barangay Taculing, ciudad sang Bacolod kaina sang aga.
Suno kay Barangay Kagawad Lady Gonzales, nagsugod ang kalayo sa balay ni Leticia Maculob matapos nagluntad ang brownout sa lugar.
Nagsindi sang kandila si Maculob kag nalab-ot sang kalayo ang kurtina.
Human sa light materials ang kalabanan nga mga balay rason nga nangin madasig ang paglapta sang kalayo.
Napilasan naman si Armando Esclares samtang nagasalbar sang mga kagamitan sa sulod sang ila balay.
Sa karon, nagatinir sa Bacolod City National High School ang mga pamilya nga nasunugan.
Kaangot sini, nagpanawagan si Gonzales sang bulig para sa mga nasunugan.
Suno sa barangay kagawad, sarang nga madul-ong ang donasyon sa BCNHS ukon sa barangay hall mismo sang Taculing.
