21 ka mga Bacolodnon ang napilitan nga magparebook sang ila nga flight papauli sa Bacolod City matapos nga ginpangayuan sang airlines sang S-Pass nga indi na requirement sa pagsulod sa syudad.
Suno kay Em Legaspi-Ang, executive director sa Emergency Operation Center (EOC), nagpadangat sang reklamo sa ila command center ang 21 ka mga Bacolodnon bangod sa pagpinsar nga nagaligwat-ligwat ang pagsulundan sa syudad.
Apang paathag sini nga nagapabilin nga nagasunod ang Bacolod City Government sa ginpagwa nga Executive Order No. 53 ni Bacolod City Mayor Evelio “Bing” Leonardia kun sa diin nakabutang nga indi na required ang S-Pass para sa mga magasulod sa syudad kag vaccination card ukon vaccination certificate nalang ang ginapangita para sa mga fully vaccinated individual.
Nahibaluan nga yara na sa counter sang airport ang mga pumuluyo kag magasakay nalang sa eroplano sang ang mga ini ang ginhambalan nga indi sila mahimo makabyahe bangod ginapangita sa probinsya sang Negros Occidental ang S-Pass.
Suno pa kay Ang, nakigsapol naman ang mga ini sa manager sang tanan nga airlines nga naga-operar sa Bacolod-Silay Airport kag ginpaathag ang ordinansa sang syudad.
Apang nagpaathag man ang director sa Civil Aviation Authority of the Philippines (CAAP), ginpamangkot man nila sa Provincial Government ang natuhoy sa kinalain sang travel requirement sang Bacolod City, apang nagpanindugan suno sa mga ini ang opisyales sa probinsya nga kinahanglan gid ang S-Pass bangod sa probinsya nahamtang ang airport.
Dugang pa sang mga ini nga kinahanglan nga mag-apply sang transit pass ang mga Bacolodnon nga magabyahe.
Suno kay Ang, ang Bacolod-Silay Airport ang isa ka National Government Airport.
Panindugan sang Executive Director sa EOC nga indi na kinahanglan sang transit pass sang mga taga Bacolod bangod wala man ang mga ini nagatransit sa probinsya kag masami may nagahulat na nga sugat nga deretso nagabayhe sa mga ini padulong sa syudad sang Bacolod.
Suno kay Ang, ang tinutuyo sang syudad nga mapahagan-hagan ang palas-anon sang mga byahero sa ila nga pagbyahe kag ang tikang ang kabahin man sa amat-amat nga pagbukas sang ekonomiya.
Gindumdom man sini nga sang hugot pa ang restriksyon, kag pipila palang ka mga special flights ang ginapahanugutan, nagabutang pa sang separado nga desk sa airport para sa syudad kag sa probinsya.
Pasalig naman ni Ang nga magapakig-angot sila sa Department of Interior and Local Government (DILG) nga magpatawag sang coordinated meeting sa Bacolod City kag Negros Occidental agud nga matul-id ang problema.
