21 ka balay ang totally damaged samtang napulo naman ang partially damaged sa sunog nga nagluntad sa Purok Magtiayon, Brgy. 10, Bacolod City, alas 11:45 kaina sang aga.
Ang sunog ang nagsugod sa balay ni Edson Lorania.
Sa interview sang Bombo Radyo kay Evangeline, nagapanglaba ini sang nakakita ini sang kalayo sa ila mga kaingod balay gani siya ang nagsinggit sang sunog.
Suno iya, minuto lamang ang nakaligad kag nagdako kag naglapta na ang kalayo sa mga pamalay bangud himo ang mga ini sa light materials.
Suno diri, gin-ubos gid sang kalayo ang balay sang iya utod nga si Danilo Cabahan Jr., isa ka construction worker kag ang TV kag birth certificate lamang sang bata sini ang iya nasalbar.
Gilayon naman nga nagresponde ang mga katapo sang Bureau of Fire Protection kag nagbinuligay man ang mga pumuluyo sa pagtapna sang kalayo.
Gindeklarar ang first alarm alas 11:54 sang aga kag nagdeclare sang third alarm alas 11:56 sang aga.
Sa karun ginahibalo pa ang gintunaan sang kalayo.
Alas 12:46 sang hapon gindeklarar nga fire-out kag indi magnubo sa 31 ka pamilya ang apektado.
Sa data nagikan sa Bureau of Fire Protection, P155,000 ang estimated nga balor sang halit.
