Aminado ang gobernador sa probinsya sang Negros Occidental nga tanan ang apektado sa mabaskog nga ulan dala sang ginpabaskog nga Hangin Habagat kun sa diin may mga ciudad kag banwa nga nagpatuman sang evacuation.
Sa interview sang Bombo Radyo Bacolod kay Negros Occidental Governor Eugenio Jose ‘Bong’ Lacson, halos tanan ang apektado ang daily routine bangod sa pag-ulan kun sa diin may nga lugar nga ginbaha, kanselasyon sang klase kag mga evacuation efforts.
Sa nabatun sini nga report alas-6:00 kagab-i, kapin 23,000 ang apektado nga pamilya ukon 75,000 ka indibidwal.
Iban sa mga apektado ang nagpabilin sa ila mga lugar, apang may iban naman nga nagtinir sa evacuation centers.
Aminado ang gobernador nga nakita sini ang pagtinguha sang mga local government units (LGUs) nga maserbisyuhan ang mga apektado nga pumuluyo.
Nakadepende naman sa ginareport sang LGUs nga numero sang mga evacuees ang ginapadala nga bulig sang provincial government.
Aminado si Lacson nga indi gid mahatag ang 100 porsyento nga panginahanglanon sang mga evacuees apang nagapati ini nga may nagakaigo pa nga pondo ang mga LGUs nga sarang magamit sa paghatag sang bulig.
Ang Department of Social Welfare and Development (DSWD) ang may ginasunod man nga formula kun pila ang ipadala nga foodpacks depende sa kadamuon sang evacuees sa mga evacuation centers.
Samtang madasig man ang paghulag sang mga LGUs sa bulig sang Department of Public Works and Highways (DPWH) kun may magluntad nga landslide, para sa madasig nga clearing operations.
Panawagan ni Lacson sa mga pumuluyo, nga likawan na lamang ang pagbyahe kun wala man sang emerhensya nga kaladtuan.
Samtang panugyan man sini sa mga residente nga magsunod na lamang kun may abiso ang LGUs sa pagpatuman sang evacuation.
