21 na ka mga hospital personnel sang Teresita Lopez Jalandoni Provincial Hospital ang ginpaidalum sa isolation.
Suno kay Negros Occidental Provincial Administrator Atty. Rayfrando Diaz, sa 21 ka mga gin-isolate nga hospital personnel; pito diri ang kumpirmado nga positibo sa COVID-19, walo ang direct contact samtang anom naman ang under observation.
Bangod sini, ginapaalinton ni Diaz sa publiko nga limitado lang anay sa emergency cases ang iban nga serbisyo.
Ginalantaw nga nagpositibo sa virus ang mga staff bangod madamo sang mga pasyente nga nagpadulong sa ospital agud magpacheck-up.
Suno diri, nagpacheck-up ang mga pasyente para kuntani sa lain nga mga balatian kag ini bangod may sintomas sang COVID-19, apang antes ang mga ini ma-admit isa sa requirement ang RT-PCR testing ukon Rapid Test kun sa diin madamo sang natukiban nga positibo.
Ginapasalamat ni Diaz nga ang mga pasyente nga COVID positive ang wala na admit sa ospital bangod sa COVID-19 symptoms kundi bangod sa iban nga balatian.
Ang mga positibo ang gindala na sa Cadiz City Distrizt Hospital nga amo ang nagaserbe nga COVID Hospital sa Negros Occidental.
Paathag ni Diaz nga santo sa record, makita nga madamo sang mga positibo sa virus apang asymptomatic gani wala nagakahibaluan.
Ini ang nagakatukiban lang matapos ang pagpaidalum sa Rapid Test nga masami ginapatigayon bangod sa nanarisari nga rasun kag indi bangod may ginabatyag nga sintomas sang COVID-19.
Gilayon naman nga nagmando si Governor Eugenio Jose “Bong” Lacson sa Provincial Health Office nga tagtagan sang test kits ang mga District Hospitals sa probinsya kun may-ara pa sang available.
Ini agud matest ang mga gina-admit nga pasyente kag matumod kun sila ang carrier sang virus.
Pahayag pa ni Diaz nga sa karun wala pa sang kumpirmado nga Omicron Case sa Negros Occidental, apang wala naman nila ginadula ang posibilidad nga mahimo Omicron variant na ang rasun sa madasig nga paglatun sang balatian.
Ini bangod isa sa characteristic sang Omicron Variant amo nga tuman ini ka mas makalalatun kun ipaanggid sa iban nga COVID-29 variant apang ang sintomas ang masami yara lang sa ubo kag sip-on nga madasig man mag-ayo.
Nahibaluan nga ang Philippine Genome Center lang ang nagapatigayon sang Genome Sequencing sa mga specimen sample nga ginapadala sang mga local government units (LGU) kag amo ang nagatumod kun positibo sa Omicron variant ang isa ka pasyente./
