P21,000 ang balor sang illegal nga druga nga nakumpiskar sa buybust operations nga ginpatigayon sang Murcia Municipal Police Station kaupod ang Negros Occidental Police Provincial Office – City Drug Enforcement Unit (NOCPPO CDEU) sa banwa sang Murcia, sang Biyernes, Nobyembre 20.
Sa interview sang Bombo Radyo kay Police Lt. John Paul Tabujara, hepe sang Murcia Municipal Police Station, apisar nga street level individual, ginakabig nga drug personality ang subject person nga si Giovani Hechanova, 56 anyos, isa ka anay empleyado sang gobyerno kag residente sang Brgy. Abu-abu, Murcia.
Nakuha sa iya paghinakop ang ang walo ka sachet sang suspected shabu nga nagabug-at sang 3.60 grams kag buybust money nga P1,500.
Suno kay Tabujara, madugay na nga ginamonitor sang kapulisan si Hechanova kag sang ila ginpatigayon ang operasyon, wala naman ini nagbato.
Suno diri, matarong ini nga empleyado sang gobyerno sang una apang naglain ang direksyon sang kabuhi bangud sa illegal nga druga.
Natalana ang suspetsado nga pasakaan sang kaso nga pagbayolar sa R.A. 9165 ukon Comprehensive Dangerous Drugs Act of 2002.
