Nagbun-ag sang baby ang pasahero sang tricycle sa atubang sang Bacolod City Fire Station sa dalan San Juan alas-10:00 kaina sang aga.
Sa interview sang Bombo Radyo kay Fire Superintendent Jenny Mae Masip, Fire Marshal sang Bacolod City Fire Station, ginkilala ang iloy nga si Condrada Alisbo, 22-anyos kag residente sang Barangay Singcang, cuidad sang Bacolod.
Suno diri, nagbisita si Alisbo sa balay sang iya ginikanan sa Barangay Bata.
Sang nakabatyag ini nga siya ang daw magabun-ag na, gin-updan siya sang iya amay kag utod nga babayi agud nga madala sa ospital sakay sa tricycle.
Apang sang nagabyahe ang mga ini, naubosan sang gasolina ang tricycle rason nga gintulod na lamang ini sang iya amay kag utod.
Samtang wala na nakalab-ot sa ospital, kag napilitan nga magbun-ag si Alisbo sang sila ang yara na sa atubang sang Bacolod City Fire Station.
Gilayon man nga nagresponde ang naka-duty nga fire personnel sang Battalion 2 kag sang ila nga emergency medical service.
Suno diri, ang baby girl ang nabun-ag alas-10:12 kaina sang aga.
Ang pasyente ang safe naman nga nadala sa Corazon Locsin Montelibano Memorial Regional Hospital para sa nagakaigo nga pagbulong.
Dugang pa, nga gin-suggest man sang mga nurses nga “Safire” ang ipangalan sang lapsag bangud daw kaangay ini sang gem kag literal man nga nabun-ag sa atubang sang fire station.
