Ginkoronahan bilang Miss Bacolod Masskara 2024 ang 22 anyos nga si Pincess Ella Olmilla sa ginpatigayon nga Miss Bacolod Masskara 2024 coronation night kagab-i.
Nangin host sang event amo sanday Marco Gumabao kag Cristalle Pitt samtang guest performer naman amo si Patrcik Quiros.
Ang mga hurado naman amo sanday Margarita Gutierrez, Doris Jimenez, Mico Teng, Joseph Tanponco, Puey Quinones, Amaliya Shakirova kag Consul Ma Agnes Huibonhoa.
Sa Q&A portion, tatlo ka mga kandidata ang ginpamangkot sang question naggikan kay Bacolod City Mayor Alfredo ‘Albee’ Benitez nga kun sila ang mangin alkalde sang ciudad sang Bacolod, ano ang ila nga himu-on.
Sabat diri ni candidate No. 5 Pincess Ella Olmilla amo nga luyag sini ipakilala sa ciudad ang bag-o nga teknolohiya kag luyag sini nga malakip ang tanan nga Bacolodnon sa pagsanyog sang ciudad.
Suno pa diri, iya man tinguhaan nga bisan nagadevelop na ang Bacolod nga mangin super city dapat mahatagan sa gihapon sang importansya ang kultura sang matuod nga Bacolodnon.
Sa pagdaog ni Olmilla siya ang nakabaton sang P150,000 cash prize kag iban pa
1st runner up naman si Candidate No. 15: Akeisha Nicole Nuari.
Si Nuari ang naghatag sang sabat nga kun siya ang mangin alkalde hatagan sini sang suporta ang mga organisasyon nga nagatrabaho sa pag-address sang climate change.
Dugang pa sini, iya man pasanyogon ang tree planting kag pagpatuman sang husto nga paghaboy sang basura.// Siya ang nakabaton sang P100,000 cash prize sa iya pagdaog.
Samtang 2nd runner up naman amo si Candidate No. 7: Cindy Valencia.
Suno diri kun siya ang mangin alkalde sang ciudad, kadungan sang development sang Bacolod nga mangin super city, luyag sini mapasanyog man ang road widening, kag mahatagan sang husto nga health benefits kag edukasyon ang mga Bacolodnon.
Si Valencia naman ang nakabaton sang P50,000 cash prize
