Ginahulat pa sang alkalde sang La Carlota City ang resulta sang repeat test sang 22-anyos nga lalaki nga nagpositibo sa Delta variant sang COVID-19.
Sa interview sang Bombo Radyo kay Mayor Rex Jalando-on, ginpahayag sini nga ang 22-anyos nga labing una nga kaso sang Delta variant sa ciudad ang isa ka locally stranded individual nagikan sa Oton, Iloilo.
Suno sa iya, Agosto 1, 2021 sang nag-abot ini sa Bredco Port, nagpaidalum sa swab test kag nagpauli sa La Carlota apang wala ini nagcoordinate sa local government unit.
Wala man ini sang S-PASS kag duha ka address ang ginbutang sini kun sa diin ang isa amu ang Bago City kag isa amu ang Haguimit, La Carlota.
Agosto 2 sang nagpositibo ini sa virus gani siya ang gin-isolate sa sulot sang 14 ka adlaw.
Sang Agosto 12, ini ang ginreswab kag nagnegatibo sa virus gani siya ng ginpapauli na sa ila balay.
Bangud nga manubo ang cycle threshold value sang resulta sang iya swab test, apisar nga negatibo ini sa virus, ginlakip ini sa mga specimen nga ginpadala sa PGC.
Agosto 29 nagwa ang resulta nga siya ang positibo sa Delta variant.
Suno sa alkalde, ginreswab ang 22-anyos kag ginalauman nga magwa ang resulta subong nga adlaw.
Suno diri, kun negatibo ini sa virus, wala na sang dapat kahangaw-an apang kun positibo, liwat ini nga ipaidalum sa quartantine.
Nagpanugyan naman si Jalando-on sa mga pumuluyo ilabi na sa mga nagapauli nagikan sa iban nga lugar nga magcoordinate gid sa LGU.
Nagpahanumdum man ini nga magsunod sa health protocols kag indi magkahadlok nga magpabakuna kun mahatagan sang kahigayunan.
