22 ka mga barangay sa probinsya sang Negros Occidental ang nagdugang sa mga gindeklarar nga cleared na sa illegal nga druga.
Suno kay Nicholas Gomez, pinuno sang Philippine Drug Enforcement Agency Negros Occidental, 22 nagikan sa 63 ka applicant barangays ang gindeklarar nga drug-cleared kadungan sang 32nd Regional Oversight Committee deliberation on barangay drug clearing kahapon.
Ang LGU nga may pinakamadamo nga drug-cleared barangays amo ang Bago City nga may yara sang tatlo kalakip ang Abuanan, Sampinit kag Atipuluan.
Suno kay Gomez, nagalaom ang PDEA nga madamo kuntani ang madeklarar nga drug-cleared nagikan sa 63 ka applicant barangays apang wala nakapasar ang iban sa pila ka criteria.
Ini ang kaangay na gid lamang sang community-based drug rehabilitation program (CDRP).
Suno kay Gomez, ginapaidalom sa CDRP ang drug surrenderers sa applicant barangay kag may yara sang tatlo ka drug test para sa ila.
Sa tion nga may magpositibo sa drug test, automatic nga disqualified ang applicant barangay sa programa.
Pagkatapos sang CDRP, nagahatag man ang local government unit sang after-care program bilang kabahin sang sustainability.
Sa kabug-usan, 291 na ang drug-cleared barangays sa probinsya sang Negros Occidental.
Nagpasalamat naman si Gomez sa mga opisyales sang mga barangay kag LGU bangud indi pa diri magauntat ang ila nga trabaho bangud may yara pa sang sustainability.
Ginpasalig naman sang Police Regional Office 6 ang padayon nga operasyon batok sa illegal nga druga.
Suno kay PRO 6 spokesperson Police Lt. Col. Arnel Solis, naga-collaborate ang PNP sa PDEA sa pagpatigayon sang anti-drug operations.
