22 ka mga estudyante sang Bacolod City College ang nalipungan matapos nakahaklo sang aso nagikan sa color smoke nga ila gingamit bilang props sa practical exam sang mga ini kahapon sang hapon.
Sa interview sang Bombo Radyo kay Dr. Johanna Bayoneta, college administrator sang BCC, nagpatigayon sang practical exam sa Physical Education ang mga first year students nga nagakuha sang kurso nga Education sa activity center sang buluthuan kag sang ang ikaapat na nga batch ang nagperform, naggamit ang mga ini sang color smoke.
Paglupok sang color smoke, amat-amat nga nagkalalipong ang mga estudyante.
May pila man nga naglain ang pamatyag kag nakaangkon sang kabudlayan sa pagginhawa lakip na ang isa ka Public Order and Safety Office guard nga nagsulod sa activity center agud maghimos sang mga gamit sang mga nagkalalipong nga mga estudyante.
May mga estudyante nga gindala sa ospital samtang may yara naman nga sa ambulansya sang Disaster Risk Reduction and Management Office nagpabilin bangud may yara man sang oxygen cylinder sa sulod.
Suno kay Bayoneta, indi required ang paggamit sang color smoke sa practical exam kag wala sang ihibalo ang manunudlo nga may dala sini ang mga estudyante.
May nagpadulong naman nga katapo sang Bureau of Fire Protection sa lugar agud tsekyaron ang kaundan sang color smoke.
Suno sa iya, magapatigayon sang imbestigasyon ang eskwelahan tuhoy sa natabo nga insidente.
