Yara na sa maayo nga kahimtangan ang 22 ka mga estudyante sang Bacolod City College nga nagbatyag sang hyperventilation kahapon matapos makahaklo sang aso nagikan sa color smoke nga gingamit sang mga students nga may activity sa Physical Education class.
Suno kay Dr. Ma. Johanna Ann Bayoneta, college administrator sang BCC, ang hyperventilation sang mga estudyante alas-4:00 kahapon sang hapon ang bangud sa smoke canon nga masami ginagamit sa gender reveal.
Bangud sirado ang activity center sa sulod sang BCC, nahaklo sang mga estudyante ang color smoke nga ginaprescribe sa outdoor activity gani naglain ang ila nga pamatyag.
Suno sa college administrator, ang performance task ang ginbutang sa activity center bangud anom ka sections ang first year.
Isa lang ka color smoke ang gingamit sang ikaapat nga performer sa tuyo nga sorpresahon ang mga nagtambong.
Wala naman ginrequire ang mga estudyante nga maggamit sang color smoke kundi inisyatibo lang ini sang mga estudyante.
Kadasig naman nga nakagwa sa activity center ang iban nga estudyante nga wala naglain ang pamatyag kun sa diin naglapta-lapta ang mga ini agud indi maglaton-laton ang ila ginabatyag.
Tatlo ka estudyante kag duha ka guard nagikan sa Public Order and Safety Office ang gindala sa Corazon Locsin Montelibano Memorial Regional Hospital agud nga ipaidalom sa X-Ray kag iban pa nga test, samtang ang iban ang gindala sa iban nga ospital.
Aminado si Bayoneta nga ini ang una nga kahigayunan nga natabo ini sa BCC gani igapaidalom sa laboratory test ang gingamit nga color smoke.
Magapatigayon man sila sang imbestigasyon sa mga estudyante agud indi na maliwat ang kaangay nga insidente.
