22 ka mga pumuluyo sang Negros Occidental ang nagdugang sa mga natapikan sang coronavirus sa probinsya samtang duha naman sa ciudad sang Bacolod.
Sa COVID-19 Case Bulletin No. 119 sang Department of Health Region 6, isa diri ang nagikan sa ciudad sang Talisay; duha sa Himamaylan; isa ka Silay City; isa sa San Carlos City; duha sa Sipalay City; tatlo sa ciudad sang Bago; duha sa Manapla; isa sa Murcia; tatlo sa Kabankalan; duha sa Calatrava; isa sa Valladolid; isa sa Hinigaran; isa sa Pontevedra; kag isa sa Binalbagan.
Lunsay mga locally stranded individuals ang mga ini.
Samtang isa naman ka 21-anyos nga babaye kag isa ka 32-anyos nga lalaki, lunsay mga indigenous case, ang nagdugang sa ciudad sang Bacolod.
Sa karun, yara na sa 329 ang kabug-usan nga kaso sang COVID-19 sa Negros Occidental samtang 95 naman ang sa ciudad sang Bacolod.
