BACOLOD CITY-21 ka opisyales kag iban pa nga indibidwal nagikan sa Barangay Alangilan, ciudad sang Bacolod ang ginkasuhan sang Criminal Investigation and Detection Group (CIDG) Bacolod angot sa anomaliya sa distribusyon sang social amelioration program (SAP) cash assistance.
Suno kay P/Chief Master Sgt. Ramiro Gocotano, officer-in-charge sang CIDG-Bacolod, ginkasuhan ang punong barangay, barangay kagawad, barangay secretary kag mga surveyors sang Alangilan nga ginalakipan sang mga public school teachers, barangay staff kag mga utod kag hinablos sang mga opisyales sa barangay.
Ang mga ginkasuhan amo sanday Punong Barangay Dejie Tanista Sr., Barangay Kagawad Michael Solano, kag Barangay Secretary Lilia Magan.
Ang mga ini ang nagtukod sang selection process team nga kaangay man nga ginpasakaan sang kaso.
Ang ginkasuhan nga survey team amo sanday Johnrey Tanista, Ian Tanista, DJ Tanista Jr., lunsay mga kabataan sang punong barangay, Myrna Villaruel, Barangay Health Worker, Donna Altaras, Glenda Mae Tipon, Arlene Lamit, Edelyn Medina nga mga public school teachers, Melissa Velit, Maricel Villaflor, Ammy Remada, Leslie Ligaya, Catherine Javier nga mga barangay staff.
Ginkasuhan man sanday Zara Mae Alegro, hinablos sang punong barangay, Lyka Magan, bata, Marnel Villanueva, hinablos, Rasel Alegro, sister in law kag si Jasime Guadalupe nga utod sang Barangay Secretary.
Ang selection process team ang nagapili sang pagahatagan sang financial assistance kag kalabanan sang ginalista sang mga ini ang mga close relatives.
Pila diri amo ang mga mag-asawa nga parehas nga nakabaton, mga persona nga residente kag nakabaton gikan sa iban nga lugar.
Madamo man sang reklamo nahanungod sa mga kwalipikado nga persona nga wala gintagaan bangod ginbutang sa listahan nga miyembro sang 4Ps, apisar nga indi ang mga ini miyembro.
Samtang madamo naman nga miyembro sang 4Ps apang kaupod sa nahatagan.
Sila ang ginkasuhan sang paglapas sa RA 3019 ukon Anti-Graft and Corrupt Practices Act kag RA 11469 ukon Bayanihan to Heal as One Act of 2020.
Ginkasuhan man ang isa ka Purok Chairman sa Barangay Banago diri sa ciudad sang Bacolod angot sa anomaliya sa social amelioration program (SAP) cash assistance.
Suno kay P/Chief Master Sgt. Ramiro Gocotano, officer-in-charge sa CIDG-Bacolod, ang ginpasakaan sang kaso amo ang purok chairman sang Purok Tinagong Paraiso, Barangay Banago, Bacolod City nga si Ernesto Gonzaga.
Ang respondent ang magapangatubang sang kaso nga paglapas sa Republic Act 3019 ukon ang anti graft and corrupt practices act kag Republic Act 11469 ukon ang bayanihan to heal as one act.
Hunyo 8 sang nagpadangat sang reklamo ang SAP beneficiary nga ginkilala kay Ronald Doronela kag ang witness sini nga si Ronald Gumabra.
Suno kay Gocotano, matapos nga mabaton ni Doronela kag Gumabra ang ayuda nga P6,000, kag nag-agi sa balay sang Purok Chairman nga si Gonzaga, gintawag sila sang chairman kag ginpamangkot kun nakakuha na sang ayuda.
Ginpahibalo naman sini nga kuhaon ang P4,000 nagikan sa ayuda bangod gamiton ini nga panggasto sa mga frontliners.
Ginhatag ni Doronela ang apat ka libo ka pesos samtang nagpamalibad naman si Gumabra nga maghatag bangod gamiton man sini ang ayuda para sa kinahanglanun sang pamilya.
Samtang nagpahayag naman si Gocotano nga ang ginapanghatag nga financial assistance ang para sa mga benepisyaryo kag indi ini pwede nga intrahan ukon buhinan sang barangay.
Ginklaro man nga may budget nga nakatalana para sa pag-akumodar sa mga frontliners.
