Nagdangat sa kapin 22 ka tawo ang ginreport nga napatay bangud sa mabaskog nga ulan kag iban pa nga epekto sang tatlo ka weather system.
Ang Benguet ang may pinakadamo nga fatalities, nga nagdangat sa 15 ka tawo kag kalakip diri ang 10 ka tawo nga napatay sa landslide sa Baguio.
May mga ginreport man nga casualties sa La Union, Rizal, kag Batangas.
Samtang, tatlo ka tawo ang padayon nga ginapangita. Isa halin sa Alaminos, Pangasinan; isa sa Batangas City, Batangas; kag isa naman sa Candelaria, Quezon.
Suno sa NDRRMC, ginabanta nga 4.8 milyon ka tawo ang naapektuhan sang Luis, Maymay kag Habagat.
Sa nasambit nga numero, yara pa sa evacuation centers ang kapin 447 mil ka tawo ukon 146 mil ka pamilya, nga nagapangita sang temporaryo nga puluy-an kag seguridad bangud sa kalamidad.
Samtang, kapin 1,800 ka balay ang nadamage sang malain nga panahon kun sa diin 1,600 ang partially damaged, samtang 178 ka balay ang totally damaged.
Nagdangat sa P3.3 billion ang halit sa imprastruktura samtang nagdangat naman sa P689.7 million na sa agrikultura.
Samtang nagapadayon ang pagresponde sang gobyerno, kapin P592.5 million nga ayuda ang nahatag na sa mga naapektuhan nga komunidad.
