Patay ang 23-anyos nga lalaki matapos gintiro sang ginaalegar motorcycle riding suspects sa Purok Balinday, Brgy. 2, Bacolod City, alas 2:45 kahapon sang hapon.
Sa interview sang Bombo Radyo kay Police Captain Leo Estopa, hepe sang Bacolod Police Station 2, ginkilala ang biktima kay Felix Olvivado Jr., residente sang Purok Lampirong, Brgy. 2, Bacolod City.
Suno kay Estopa, papauli na kuntani nagikan sa barangay hall ang biktima kaupod ang live-in partner sini kag isa ka witness sang hinali lang nga gintiro sang wala pa nakilal-an nga mga suspetsado kun sa diin nakaangkon ini sang igo sa kilid kag dughan.
Gilayon naman nga nagpalagyo ang nagluthang sakay sa motorsiklo.
Ginhingagaw pa dala si Olvivado sa balay-bululngan apang gindeklarar nga dead on arrival.
Suno sa station commander, nagikan sa barangay hall ang biktima bangud ginreklamo sini ang chief tanod sang nasambit nga barangay nga si Jojo Almirante bangud iya ginaalegar nga ini ang nagtiro sa iya sang Agosto 30 apang nakalikaw si Olvivado.
Ginpanginwala ini ni Almirante samtang indi naman magpaareglo si Olvivado gani ginschedule sila sa masunod nga hearing.
Nagpauli si Olvivado kag nagpabilin naman sa barangay hall si Almirante.
Suno kay Estopa, may yara sang kaso nga pagpangawat kag R.A. 9165 ang biktima sa Police Station 2 apang naka-avail sang plea bargaining agreement.
Sa karun, nagapadayon pa ang imbestigasyon sang kapulisan sa identity sang nagluthang kag sa motibo sang krimen.
