Nakahanda naman ang Andres Bonifacio Elementary School (ABES 1) para sa May 9 elections.
Sa interview sang Bombo Radyo Bacolod kay Lolita Cabahug, ang principal sang ABES 1, nakahanda na ang 23 ka mga classrooms agud himuon nga polling precincts.
Suno kay Cabahug, may ginhanda sila nga 23 ka mga polling precincts kag 23 ka holding areas.
Suno diri tanan nga mga classrooms sa tanan nga grade levels ang gamiton para sa polling precincts magluwas na lamang sa ancillary.
Naghanda man ang eskwelahan sang isa ka kwarto para sa isolation sang mga nagahilanat ukon sa mga magalain ang pamatyag sa adlaw sang election kag naghanda man ang mga ini sang clinic.
Nakabantay man ang mga Barangay Health Workers kasubong man ang medical team.
Ginpreparar naman ang mga banyo sang eskwelahan.
Nakacoordinate naman sila sa Bacolod Police Station 2 sa pagpanguna ni Police Captain Paul Vincent Pendon para sa seguridad sa adlaw sang eleksyon.
Ginpakay-o naman sini ang mga dapat kay-uhon para sa water supply.
Lima ka mga barangay sa syudad sang Bacolod ang magaboto sa ABES 1 kag ginalauman ang magadangat sa kapin linibo ka mga botante.
Ginalauman nga sa Biyernes sang hapon magapatigayon na sang final testing kag sealing sang VCMs.
May yara sang 23 ka mga manunudlo ang kabahin sang Board of Election Inspectors (BEIs) kag napulo ka support staff ang magaserbe sa ABES 1 sa May 9.
Nagpanawagan man si Cabahug sa mga botante nga temprano pa magpadulong sa polling precints agud nga makaboto man sang temprano.
