16 ka mga panimalay kag 23 ka mga pamilya ang apektado matapos ginpaidalum sa lockdown ang Purok Fire, Brgy. 8, Bacolod City kahapon bangud isa ka residente ang nagpositibo sa COVID-19.
Sa interview sang Bombo Radyo kay Punong Barangay Joan Magalona, ginpahayag sini nga ang 56 anyos nga babaye ang nagpacheck-up lang kuntani sang Hulyo 24 bangud nagasuprer ini sang mga sintomas sang virus apang wala na ginpabalik kag gin-admit sa ospital.
Suno kay Magalona, Brgy. Bata pa ang nabutang sa address sang pasyente bangud didto gid ang iya puluy-an apang nagaboard siya sa nasambit nga purok.
Sang Martes suno sa punong barangay, nagwa ang resulta nga nagpositibo ini sa virus.
Suno sa iya, wala gid ini makahibalo nga may residente nga nagasuprer na sang sintomas bangud wala man ini nagpalapit sa iya.
Gindugang man sini nga ang nakibot gid siya sang nahibaluan nga may positibo sa Purok Fire bangud malinong ini kag ang Purok Narra ang ila gintutukan.
Suno kay Magalona, wala sang dapat kahangaw-an ang mga naapektuhan sang lockdown bangud naghatag na sang food assistance kag 40 packs sang bugas ang city government.
Naghingyo man ang punong barangay sa mga pumuluyo nga magbulig bantay sa mga nagagwa-sulod sa purok agud indi na madugangan ang kaso sang COVID-19 sa ila lugar.
